Shanba, 2010-Mart-20, 04:31 Приветствую Вас Mehmon
Главная » 2008 » Oktabr » 10 » РОБЕРТ ГАЙ: «САРДОР РЕЖАЛАРИМИЗНИ БАРБОД ҚИЛДИ»
РОБЕРТ ГАЙ: «САРДОР РЕЖАЛАРИМИЗНИ БАРБОД ҚИЛДИ»
22:52
Ўзбекистон-Баҳрайн учрашувидан сўнг ҳар икки терма жамоа бош мураббийлари журналистларни қизиқтирган саволларга атрофлича жавоб қайтаришди. Дастлаб бу вазифага баҳрайнликлар устози Ҳусни Зуауи киришди. Жаноб Ҳусни сўзини ўйин таассуротларидан бошлади.
- Авваламбор, бугунги ғалаба ва бунинг натижасида қўлга киритилган чорак финал йўлланмаси билан терма жамоангизни табриклайман. Бугун биз жуда кучли рақибга дуч келдик. Футболчиларимиз техник-тактик жиҳатдан бўш ўйин намо-йиш этишди. Бутун учрашув давомида суст ҳаракат қилишди. Буни жисмоний тайёргарлигимиз бўш эканлиги билан изоҳлаган бўлардим. Бошқа томондан шогирдларим кучли руҳий босим остида ўйнашди. Айниқса, иккинчи бўлимда ўзларини йўқотиб қўйишди. 4, 8,10, 14-рақам остида ҳаракат қилган футболчиларингизни алоҳида кўрсатган бўлардим. Айнан уларнинг жамоавий ўйинни шакллантира олиши бугун терма жамоангизнинг ишончли ва ҳаққоний ғалабасини таъминлади. Кучли рақибдан чўчиб ўйнаш охир-оқибат мағлубиятимизга сабаб бўлди.
- Эронга қарши учрашувдаги мағлубиятдан қандай хулоса чиқарилган эди?
- Очиғи, бугун мен фақат бир терма жамоа майдонда ҳаракат қилганини кўрдим. Ўзбекистон терма жамоаси барча чизиқларда биздан устунлик қилди. Кучли ҳимоя, ақлли марказ ва тезкор ҳужум... бу омил бугунги ўйин тақдирини ҳал қилди. Жамоангиз қитъа чемпионатига жиддий ҳозирлик кўрганини исботлади.
- Жамоангиз Эронга қарши ўйин билан солиштирганда бугун ўша кунги ўйиннинг ярмини ҳам кўрсатмади. Бунинг сабаби нимада?
- Бугунги ўйинга танланган тактикамизга кўра биринчи бўлимда дуранг натижани сақлаб қолиб, танаффусдан сўнг гол киритишни мақсад қилгандик. Афсуски, биринчи бўлимнинг сўнгги дақиқасида ўз дарвозамиздан тўп ўтказиб юбордик. Футболчиларимиз ўзларини худди бўлим шу тариқа якунланади, деб ҳис қилишди. Оқибатда дарвозамиз ишғол қилинди.
- Баҳрайн олдига қандай вазифа қўйилган эди?
- Мақсад жаҳон чемпионатига бериладиган тўрт йўлланмадан бирини қўлга киритиш эди. Минг афсуски, бунинг уддасидан чиқа олмадик. Ўзбекистон катта давлат. Юртингизда истеъдодлар жуда кўп. Баҳрайн эса кичик давлат. Бу ерда иқтидорли футболчиларни танлаб олиш имконияти чекланган.
- Ўзбекистон терма жамоасининг Осиё чемпиони бўлиш имкониятларини қай даражада баҳолайсиз?
- «Плей-офф»да кучсиз рақиблар бўлмайди. Ўйин куни қайси терма жамоанинг тайёргарлиги кучли бўлса, ўша жамоа ғалаба қозонади. Гуруҳимизда дастлабки икки ўринни эгаллаган Эрон ва Ўзбекистон терма жамоаларининг имкониятлари деярли тенг. Фақат бундан унумли фойдаланиш керак.
Шундан сўнг анжуманлар залига терма жамоамиз устози Роберт Гай кириб келди. Роберт Сергеевич ҳам ҳамкасби сингари ўз сўзини ўйин тафсилотларидан бошлади.
